زہر اور تریاق

دیدبان شمارہ ۔ ۷

زہر اور تریاق

تحریر ۔ یوسف عزیز زاہد ۔

پشاور ۔ پاکستان

"یہ لو ۔پی لو"

"کیا ہے اس میں ؟کیا پی لوں؟"

"چپ رہو ! سوال کرنے کی اجازت نہیں ہے"

"مگر سوال تو زندگی کی علامت ہے۔ میں مرنا نہیں چاہتا"

"وہ تو مسکرا کر پی گیا تھا۔ اُسے خبر تھی وہ کیا پی رہا ہے؟"

"مگر میں تو بے خبر ہوں۔ مجھے کیا معلوم؟ ۔ اچھا بتاؤ کیا پینا ہےمجھے"

"کہا نا چپ رہو۔ سوال کرنے کی اجازت نہیں ۔

"سوال؟ کیسا سوال؟ میں تو بولنے سے بھی معذورہوں۔ میرے ہونٹوں کی کو ٹھڑی پر تالا لگا کر چابی اندھے کنوئیں میں پھینک دی گئی ہے۔"

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

ماسٹر صاحب تختہ سیاہ پر سفید چاک سے ایک نقطہ لگاتے ہیں اور کلاس سے مخاطب ہو کر کہتے ہیں۔ اگر اس نقطے کو مرکز مان کر دائرہ کھینچا جائے تو۔۔۔۔۔۔۔

"تو یہ نقطہ اُس دائرے میں قید ہو جائے گا۔" آخری بنچوں سے کسی لڑکے کی آواز ماسٹر صاحب کی بات کو اُچک لیتی ہے۔ یکایک پوری کلاس کو جیسے سانپ سونگھ جاتا ہے۔ اس قدر خاموشی کہ سوئی گرے تو دھماکے کی آواز آئے۔تختہ سیاہ سے علیحدہ ہو کر اورسفید نقطے کو چھوڑ کرماسٹر صاحب انگارہ آنکھوں کے ساتھ میرے قریب آکر رک جاتے ہیں۔میرا دل بری طرح دھڑکنے لگتا ہےاور جسم پسینے سے شرابور ہو جاتا ہے۔چند لمحوں کے لئے ماسٹر صاحب کے چہرے پر حیرت کا سایہ لہراتا ہےلیکن دوسرے ہی لمحے اُنکا جسم وحشت اُوڑھ لیتا ہے۔بید کی چھڑی سے وہ میرا جسم روئی کی طرح دُھنک ڈالتے ہیں۔ خود کو بچانے کی کوشش میں میرے مُنہ سے بے معنی سی آوازیں نکلتی ہیں مگر میں ماسٹر جی سے اپنا قصور تک دریافت نہیں کر سکتا۔مجھے سوال کرنے کی اجازت نہیں۔

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

تمھیں کہا بھی تھا خاموش رہا کرو۔ ہر وقت بولتے رہتے ہو۔یہی حشر ہوتا ہے زیادہ بولنے والوں کا۔

مگر میں کب بولا تھا۔ماسٹر صاحب کی بات تو اُس نے کاٹی تھی۔

وہ بات کاٹے بغیر رہ بھی تو نہیں سکتا۔

اچھا اب تم چپ یہ پیالہ پی جاؤ۔

مگر یہ جانے بغیر کہ اس پیالے میں کیا ہے، میں کیسے پی سکتا ہوں؟

"تو پھر چپ رہو۔۔۔۔۔۔ خاموش"

مگر میں کب بول رہا ہوں۔میری آواز تو کنوئیں میں قید ہے۔

تو پھر یہ کون ہے؟جو بول رہا ہے؟

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

مولوی صاحب سورہءِ فاتحہ کا ترجمہ بڑی دلجمعی سے بیان کر رہے ہیں۔ وہ بڑے انہماک سے سن رہا ہے۔

۔۔۔۔۔ اے اللہ ہم تیری ہی عبادت کرتے ہیں اور تجھ ہی سے مدد مانگتے ہیں۔ دِکھا ہم کو راہ سیدھی۔راہ اُن لوگوں کی نعمت کی ہے تو نے اُوپر اُن کے۔ سِوا اُن کے۔ جو غصہ کیا گیا اُوپر اُن کے اور نہ گمُ راہوں کی۔۔۔۔۔

"آمین"۔۔ مولوی صاحب کے خاموش ہوتے ہی میرے ساتھ سارے بچے بلند آواز میں کہتے ہیں۔

"مگر مولوی صاحب نقطہ تو ایک ہی تھا نا۔۔۔؟ تو پھر نقطہ جو دائرے کی قید میں ہےتقسیم کیسے ہوا اتنے گروہوں میں اور نقطہ جسے مرکز مان کر دائرہ کھینچا گیا۔۔۔ قیدی کیسے ہوااس دائرے کا؟"

وہ جو اتنی دیر سے سورہءِفاتحہ کا ترجمہ پورے انہماک اور خاموشی سے سن رہا تھا یکایک بولنے لگتا ہے اور اس کے سوال مولوی صاحب کے ادراک کی سرحدیں پار کر تے چلے جاتے ہیں۔

اُن کی آنکھیں اپنے حلقوں سے اُبلنے لگتی ہیں۔

"کس نقطے کی بات کر رہے ہو؟" مولوی صاحب کے میٹھے دھیمے لہجے میں اچانک بادلوں کی سی گھن گرج در آتی ہے۔

"وہی نقطہ جس کے گرد زمین ، چاند، سورج، سیاروں،ستاروں بلکہ پوری کائنات کا دائرہ بنایا گیا ۔" وہ مدرسے کا طالب علم ہوتے ہوئے پوری سنجیدگی سے کہتا ہے۔

"کیا ہوا ہے اس نقطے کو"۔ سارے جسم کا خون مولوی صاحب کے چہرے پر سمٹ آتا ہے

"وہ نقطہ قید کیو ں ہوادائرے میں اور اُس نقطے کو تقسیم کس نے کیا؟

مولوی صاحب کا جلال لاتوں، گھونسوں اور تھپڑوں کی صورت میرے کپڑوں اور کپڑوں کے اندر میرے جسم کو اُدھیڑ کر رکھ دیتا ہے۔مولوی صاحب کے منہ سے کف کے ساتھ غلیظ گالیاں بھی اُبلتی ہیں اور مسجد میں میرا داخلہ ممنوع قرار دیا جاتا ہے۔

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

تو کون کہتا ہے اتنی بکواس کرنے کو۔۔۔ قینچی کی طرح چلتی ہے تمھاری زبان۔

مگر میں کب بولا تھا۔۔۔ میں تو گونگا ہوں ۔ میں نے تو اپنی زبان مصلحت کی انگیٹھی میں ڈال رکھی ہے۔

تو پھر کون ہے جو بول رہا ہے؟

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

جلتے ہوئے گوشت کی سڑانڈ چاروں طرف پھیل جاتی ہے

"اتنی اذیت ناک موت؟ اُف! اُس نے اپنے جسم کو آگ میں جھونک دیا؟ حرام موت مر گیا۔

موت حرام کیسے ہوسکتی ہے؟

خودکشی حرام ہے۔۔۔۔ اُسے خودکشی کی بجائے سمجھوتہ کرلینا چاہئے تھا۔

کیسا سمجھو تہ؟

چپ رہنے کا۔۔ سوال نہ کرنے کا

تب بھی کیاہوتا۔۔ کوئی قتل کر دیتا اُسے ،جعلی پولیس مقابلے میں دہشت گرد سمجھ کر مار دیا جاتا اُسے ۔ کوئی حادثہ بھی پیش آ سکتا تھا۔ کوئی تیز رفتار کار اُسے کچل کر گزر جاتی۔ کینسر بھی اُس کی موت کا سبب بن سکتی تھی، ہارٹ اٹیک بھی آسکتا تھا۔ بلڈ پریشر ، شوگر، برین ہیمرج۔۔۔۔ کچھ بھی ہو سکتا تھا۔۔۔۔ مرنا تو بہت آسان ہے۔ بس جینا ہی مشکل ہے۔ زندگی سوال بن جاتی ہے اور جواب کو موت آجاتی ہے۔

کہانی سنو گے؟

ہاں سناؤ

جب میں بہت چھوٹا سا تھا تو سکول جاتے ہوئے ایسی سڑک پر سے گزرتا تھا جہاں اُن دنوں ٹریفک بالکل بھی نہیں ہوتی تھی ۔ اس سڑک کے کنارے ایک مجذوب کا جھونپڑا تھا۔ کبھی تو وہ آگ کے ساتھ کھیلتا ، کبھی راکھ پر پانی ڈالتا رہتا۔ ایک دن جب میں وہاں سے گزر رہا تھا اُس نے اچانک اُٹھ کر بھاگنا شروع کر دیا۔وہ آسمان کی طرف دیکھتا ، قہقہے لگاتا اور ساتھ ساتھ کہتا جاتا

"دیکھو مارتا خود ہے اور بہانے بناتا ہے" اِدھر اُدھر سے کچھ لوگ سڑک پر آکر اُس کا تماشا کرنے لگے۔ اچانک کسی طرف سے ایک وحشت زدہ بیل نکل کر اُس کے سامنے آیا اور اپنا سینگ اُس مجذوب کے سینے میں اُتار دیا۔ گرتے گرتے اُس مجذوب نے قہقہ لگایا اور کہا۔ ۔۔ دیکھا۔ میں نہ کہتا تھا مارتا خود ہے اور بہانے بناتا ہے۔

"سب بہانے ہیں۔ وقت پورا ہو تو موت کو کون روک سکتا ہے۔

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

لیکن خودکشی تو حرام ۔۔۔۔ مگر نہیں۔۔۔۔ یہ خودکشی تو نہیں تھی۔

کیا مطلب؟

وہ تو بھٹے کی اینٹوں کا ایندھن بن گیا تھا ورنہ تو اینٹوں نےکچا ہی رہ جانا تھا۔

دیکھو ۔۔۔ تم نے پیالے کو ہاتھ تک نہیں لگایااور مسلسل بولے جا رہے ہو۔

کون ؟میں ؟ ۔۔۔۔ مگر میں تو خاموش ہوں۔ بولتا تو وہ تھا جو بھٹے کی اینٹوں کا ایندھن بنا تھا۔

اوہو۔۔۔۔ تو پھر یہ کون ہے۔۔ جو بھٹے کی اینٹوں کا ایندھن بنا تھا؟

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

صحرا میں شام اُتر آتی ہےاور آنکھوں میں ریت کے زرًوں کی رڑک ۔ مَل مَل کر اُس نے اپنی آنکھیں سرخ کر لی ہیں۔ تو جب وہ اپنی آنکھیں نیم تاریکی میں کھولتا ہے تو لٹیرے فرات کی جانب سے ناچتے، کودتے، فتح کا جشن مناتے آتے ہیں، خیموں کو آگ لگا دیتے ہیں بیمار کو زنجیریں پہنا دیتے ہیں۔ اور مقدس سر کو نیزے پر اُٹھا لیتے ہیں۔

قرآن شریف کی تلاوت کرتے ہونٹ اور پر نور چہرہ نوکِ سناء پر

"اطاعت اور بیعت تو لازم ہے نا"

مگر مجھے سیاہ ہاتھوں کی اطاعت قبول نہیں اور میں جھوٹ کی اطاعت سے بھی انکار کرتا ہوں۔ مجھے تو اس کی اطاعت کرنی ہے جس نے نقطے کو تخلیق کیا اور اس کے ہاتھ پر بیعت کرنی ہے جس کا سر وقار کے ساتھ نیزے پر بلند تھا۔ اور جس کے لبوں پر قرآن کی آیتیں جاری تھیں۔

خاموش ہو جاؤ۔۔ اب تمھیں یہ زہر پینا ہی ہوگا۔۔ تمھارے بولنے سے خلقت بدامنی پر آمادہ ہو سکتی ہے۔

مگر میں تو خاموش ہوں۔ دیکھو۔۔ میری زبان کٹی ہوئی ہے اور میرے جسم پر خواہشوں کے جنگل اُگ رہے ہیں۔

تو پھر کون ہے جو مسلسل بول رہا ہے؟

٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔٭۔۔۔۔۔۔۔۔۔۔٭۔۔۔۔۔۔۔۔۔۔۔٭۔۔۔۔۔۔۔۔۔٭

تو اُس کے جسم پر خواہشوں کے جنگل اُگنے لگے۔

وہ جو پہلے کی چاہت تھی جب دوسرے کی خواہش بنی تو دوسرے کا جسم خواہش کے جنگل میں چھپنے لگا۔ اور اُس نے چاہا کہ پہلے کی چاہت کو چھین لے۔ پہلے نے، کہ خواہش کا جنگل اُس کے من میں بھی پوشیدہ تھا، مزاحمت کرنا چاہی تو دوسرےنے پہلے کو قتل کر ڈالا۔

دیکھا تم نے؟۔۔۔۔ نقطہ کیسے تقسیم ہوا اور نقطے کو کس دائرے نے قید کیا؟

مگر قتل کرنا اور قتل ہونا تو نقطے کی جبلت میں لکھ دیا گیا تھا ۔ پھر اس میں نقطے کا کیا قصور ۔

اب تو یہ زہر پیالہ تمھیں پینا ہی پڑے گا ۔ اُٹھاؤ یہ پیالہ اور پی جاؤ۔۔۔ جلدی ۔۔۔

ہرگز نہیں ۔۔ میں جانتے بوجھتے خودکشی نہیں کرسکتا۔

تم جانتے ہو۔"میرا ایک خوبصورت گھر ہے۔ بیوی بچے ہیں۔ گاڑی، بینک بیلنس اور بزنس ہے"

میرے من میں بھی خواہشوں کے جنگل گھنے ہونے لگے "اگر میں نے زہر پی لیا تو میں بھی مر جاؤں گا۔ تم کو نہیں نا معلوم۔۔۔ پہلے کو قتل میں نے ہی کیا تھا اور کوًے نے زمیں کھود کر مجھے سکھایا تھاکہ مقتول کو کیسے مٹی میں چھپایا جاتاہے۔ میرے جسم پر اُگنے والاجنگل اب دور دور تک پھیل چکا ہے۔ دیکھو

میں چپ سادھ لیتا ہوں۔۔ گونگا۔۔

تو دوسرے نے پہلے کو قتل کردیا اور اُسے مٹی میں چھپا دیا اور ریت کی رڑک اُس کی آنکھوں کو جلاتی رہی مگر چپ۔۔۔ چپ ٹوٹ گئی ۔۔ بولنا اُس کی مجبوری تھی ۔

سنو ۔۔۔ دیکھو بس ایک سوال ! ۔۔ صرف ایک۔۔۔۔ کیا میری طرح تم بھی دوسرے کی اولاد میں سے ہو۔۔۔؟؟؟

ختم شد۔

‍