مصطفیٰ ارباب کی نظمیں

ہانکا

جس خطے پہ

ہمیں زندگی گزارتی ہے

بہت بڑی شکار گاہ ہے یہ

ہر وقت

ہانکا لگا رہتا ہے

دوڑتے دوڑتے

ہم ہانپنے لگتے ہیں

سانس اپنا راستہ بھولنے لگتی ہے

ختم ہی نہیں ہوتا یہ ہانکا

دو پاؤں والے

ہمیشہ چار پاؤں والوں کا ہانکا لگاتے ہیں

ہمارے دو پاؤں

ایک ہانکے کا شکار ہو چکے ہیں

ہم بہت خوش ہوئے تھے

اب ہمارے پاس

ہانکا لگانے والوں کی طرح

دو پاؤں ہیں

مگر پاؤں دو ہوں یا چار

ہانکا لگا ہی رہتا ہے

مصطفٰی ارباب

۔۔۔

مدھوبالا

۔۔۔۔۔۔۔۔۔۔۔۔

میں

اب بھی

اسے دیکھ رہا ہوں

جس کی آنکھوں میں

کہکشاؤں کے اسرار پوشیدہ ہیں

اس کی مسکراہٹ میں

ان چھوا تخیل خوابیدہ ہے

اس کے بدن کے گرد

طلسمی گردش جاری ہے

اس کے پاؤں

محبت سے لب ریز دلوں پر چہل قدمی کرتے ہیں

ان پیروں کے دباؤ سے

نشیلی مدھ کشید کی جا سکتی ہے

اس کی آواز کی لے

ہر ذرے کو

سماعت  کی قوت عطا کر دیتی ہے

میں

اس کی حدت کو

محسوس کر رہا ہوں

جو مجھ سے پہلے

ایک اور زمانے میں جنمی تھی

اس کے جمال نے

مجھے

تسخیر کر لیا ہے

میرے بعد

اس دھرتی کے آخری انسان تک

محبت کا تسلسل جاری رہے گا

مصطفٰی ارباب

‍