‍

حمد باری تعالی

عبیرہ احمد

خانہ دل سے باب حرم تک جس نے رسائی مجھ کو دی

تیری عطا ہے مالک تو نے جو تنہائی مجھ کو دی

کار نہایت تھا لیکن اس شخص پہ دل نے صبر کیا

اب جو فراغ نصیب ہوا اب جو شکیبائی مجھ کو دی

ہاتھ بڑھایا اور کف افلاک پہ پہلی بیعت کی

کار سخن میں آج قلم نے پہلی کمائی مجھ کو دی

یوں تو کسے کیا کیا نہ در رحمت سے ملا ہوگا لیکن

حمد ہوئی تو جو تسکین عہدہ برائی مجھ کو دی

تیری عطا پر زندہ ہے اور تیرا رضا جویندہ ہے

وہ دل جس پر تو نے پل دو پل کی خدائی مجھ کو دی

ہاتھ سے باندھے موسم اس نے کھول دیے یک مشت عبیر

 پھر سامان سمیٹ لیا اور اک پروائی مجھ کو دی

‍