اداریہ

سبین علی

کچھ عرصے کی تاخیر کے بعد دیدبان کا نیا شمارہ قارئین کے مطالعہ کے لیے پیش ہے۔ ادبی جرائد کی کچھ اپنی مشکلات ہوتی ہیں جن میں سے ایک اہم وجہ اردو حلقوں میں کتب خرید کر نہ پڑھنے کا رجحان بھی ہے جس کی وجہ سے جرائد   مسائل کا شکار ہو جاتے ہیں۔ دوسرے اس سائبر دور میں زیادہ قارئین ویب سائٹ کا رخ کرتے ہیں۔ اس لیے دیدبان کی ٹیم نے یہ طے کیا کہ اس سہ ماہی ادبی جریدے کو اب ماہانہ بنیادوں پہ ویب سائٹ پہ قارئین کے مطالعے کے لیے پیش کیا جاتا رہے گا ۔ تاکہ تین ماہ کے انتظار کی بجائے اگر وہ روزانہ کی بنیاد پہ کچھ اچھا پڑھنا چاہیں تو ان کے لیے ہر ماہ  تازہ اور بہترین مواد دستیاب ہو۔

دنیا نئے سماجی و مالیاتی مسائل میں الجھی ہے۔ اردو افسانے اور نظم میں بڑے متنوع  موضوعات سامنے آ رہے ہیں۔ پرانے افسانے کی طوائف کی جگہ اب  تیز رفتار شہری کلچر کے انسان ہیں جو روزگار کے پیچھے چیونٹیوں کی مانند  مشقت کر رہے ہیں۔ جنس کے لیے ہیومن ٹریفکنگ  اور پیڈو فائل نے وہ پرانا امراؤ جان ادا کا سا  چہرہ دھندلا دیا یے۔ عالمی کساد بازاری اور افراط زر میں اضافے نے محنت کش طبقے کا استحصال کیا ہے۔ عورت اور مرد کے ازلی رشتے میں بھی سائبر سویلائزیشن نے نئے چیلنج پیش کیے ہیں۔  انہیں مسائل کے بیچ ان کی سماجی و نفسیاتی الجھنیں نہ صرف بڑھ گئی ہیں بلکہ ماضی سے بالکل مختلف مسائل سے نبرد ازما ہیں۔  اس بارے میں نئی نسل کے ادیب بہت اچھا لکھ رہے ہیں۔ مگر انہیں کماحقہ توجہ نہیں مل رہی ۔ اس لیے دیدبان نے ہر ماہ تین منتخب تحریروں کو اردو ادب کے بڑے اور مستند ادیبوں سے ریویو کروانے کا بندوست کیا ہے۔

اگر کوئی مصنف اپنے افسانے شاعری یا تحقیقی مقالہ پہ کسی استاد یا سینئر ادیب سے ریویو کروانا چاہیے تو بالکل تازہ تحریر جو کہیں اور شائع نہ ہوئی ہو وہ ریویو کے لیے بھیج سکتا ہے ۔ ایسی تخلیقات کو ریویو کیٹگری کے تحت الگ سے نمایاں طور پہ  آویزاں کیا جائے گا۔

امید ہے نئے خدوخال کے ساتھ اب دیدبان قارئین کے لیے مطالعے و مباحث  کا باسہولت فورم اور جریدہ بن کر سامنے آئے گا۔

‍