ایلچی کی بیوی

دیدبان شمارہ ۔ ۲۰ اور ۲۱

افسانہ:ایلچی کی بیوی

افسانہ نگار:کرن ماہاجن ، انڈیا

ترجمہ نگار -ہاجرہ ریحان

ملک میں جہاں کہیں کا بھی جے نے سرکاری پریس کے ایلچی کے ساتھ سفر کیا، لوگ ایلچی کی طرف جھک کر ایک ہی بات کہتے ،

" مگر تم کو اسے سارا پس منظر سمجھا دینا چاہئے ، بہرحال یہ یہاں سے تعلق نہیں رکھتا ناں ۔"

ایک دن ، پرانگیختہ جے نے ایلچی سے کہا ،

" کیا تم بتائو گے کہ لوگ میرے ساتھ ایسا سلوک کیوں کر رہے ہیں ؟ کیا اُن کو میرے چلنے کے انداز میں کچھ محسوس ہوا ہے ؟ میرے پیرہن میں ؟ میرا لب و لہجہ تو بالکل نہیں بدلا ویسا ہی ہے جیسا میں یہاں سے گیا تھا"۔

ایلچی مسکرایا ، " مگر یہ لوگ جانتے ہیں کہ آپ بیرون ِ ملک رہتے ہیں ۔"

جے ، بین الاقوامی اخبارات کا شہرت یافتہ کالم نگار ،.  صحافی سرکاری دعوت پر ملک کی مجموعی پیش رفت پر  رپوٹ لکھنے آیا ہوا تھا۔

" مگر کیا اس کا مطلب ہے ، " جے بولا ، " کیا اس کا مطلب ہے کہ میرا اس ملک سے تعلق ہی ختم ہو گیا ہے ، اب میں اس کو سمجھنے کی صلاحیت نہیں رکھتا ؟ بہرحال میں یہیں کا ہوں ۔ میں یہاں پروان چڑھا ہوں۔ حقیقت میں اسی لئے تو سرکار نے مجھے یہاں واپس بلا کر یہ کام سونپا ہے۔"

ایلچی نے کہا ، " یہ اچھا نقطہ ہے " ، حالانکہ صاف ظاہر تھا کہ وہ اس پر یقین نہیں کر سکا تھا۔

جے نے بھی معاملے کو جانے نہیں دیا ۔ " ہمارے لاکھوں لوگ بیرون ِ ملک رہتے ہیں۔ کیا تم اُن سب کو بھی اسی طرح محسوس کرانا چاہتے ہو؟ "

" مگر کچھ ایسی چیزیں ہوتی ہیں جناب جو صرف مقامی ہی ۔ ۔ ۔ " ایلچی بات ادھوری چھوڑ کر خاموش ہو گیا ۔

" مگر میں بھی تو یہی کہہ رہا ہوں۔ یہ ایسی کیا جادوئی چیز ہے جو میں نہیں سمجھ سکتا؟ اچھا چلو ٹھیک ہے مجھے نہیں معلوم کہ یہاں حالیہ مشہور کریکٹر کون ہے یا اس ڈسٹرکٹ کا کرتا دھرتا کون سی سیاسی پارٹی سے تعلق رکھتا ہے۔ مگر یہ سب جاننا اتنا ضروری ہی کیوں ہے؟ سب کے بالکل صحیح نام جاننے کا خبط - یہ تو کوئی دانائی نہیں۔  جبکہ جہاں تک میں سمجھ سکا ہوں ، اس جگہ کی بنیادی - بدعنوانی اور کوتاہیاں - بدلی نہیں ہیں۔ "

" ایسا لگتا ہے جناب کہ آپ اپنی پیش کی جانے والی رہورٹ کا متن سوچ چکے ہیں ۔ "  ایلچی محو ہو کر بولا۔

" یہ لوگوں کی درجہ بندی کرنے کی عادت ،  اندر کا ، باہر کا ، اوپر کا ، نچے کا۔ اور جہاں تک تمھارا خیال ہے ، میں باہر کا ہوں۔  ایسے کیسے میں - ایک غیر ملکی اس جگہ سے صفر تعلق کے ساتھ - اس عظیم ملک کے بارے میں کچھ بھی سمجھ سکتا ہے؟ آخر مجھے رپورٹ بنانے کے لئے بلایا ہی کیوں گیا ہے ؟"

" نہیں جناب ، یہ اسی لئے تو کہ آپ سمجھ جائیں ۔" ایلچی نے کہا۔

جے کو ایلچی کا طنز سمجھ آنے لگا تھا۔ " تمھارے خیال میں یہ، سب کچھ جو میں کہہ رہا ہوں ، یہی سب میرے غیر ملکی ہونے کا ثبوت ہے " , جے نے کہا ، " جیسے مجھے اسی بات پر تائو دلایا جا رہا ہو - "

" ایسا کچھ زرا سا بھی نہیں ، جناب ۔" ایلچی نے کہا مگر جے کو یقین تھا کہ اُس نے ایلچی کی آنکھوں میں چمک دیکھی تھی۔

" ٹھیک ہے ، اپنے سفر کو جاری رکھو ۔" جے بولا۔

مگر جب وہ شہر میں ارد گرد گھوم رہے تھے ، جے کا غصہ بڑھتا گیا۔ اُسے یاد آیا کہ اس ملک سے وہ آخر گیا ہی کیوں تھا، اس غریب اور گرم ملک کے لوگ بہت خودہسند تھے جبکہ ان کی خودپسندی کی کوئی وجہ بھی ان کے پاس نہیں۔  سب کے سب حقیر اور بالادست تھے۔

میں کمبخت رپورٹ تو لکھ ہی دوں گا، اُس نے سوچا۔ اور وہ کمبخت رپورٹ بالکل منفی ہو گی۔

رات کے درمیانے پہر میں ، جبکہ ایچی سو رہا تھا اُس کے پاس کال آئی.

" میں جان گیا ہوں ! " دوسری طرف سے چیختی آواز آئی، " مجھے پتہ ہے ! وہ یہ سب ہر غیر ملکی صحافی سے نہیں کہتے، صرف مجھ جیسوں سے جو یہاں سے گئے ہیں ۔ "

اپنی تمام تر برداشت کو بروئے کار لا کر ، سوتے ہوئے ایلچی نے کہا ، " شاید وہ محسوس کرتے ہوں کہ آپ ہمارے حقیر ملک سے بہت آگے بڑھ گئے ہیں، جناب۔"

" نہیں ، نہیں ، بالکل بھی نہیں ! وہ سب غصہ ہیں۔ غصہ کہ میں اس جگہ سے نکل سکا ہوں ۔ وہ مجھے واپس کھینچ لینا چاہتے ہیں !"

" یہ دورہ آپ کے اندر کے دیرینہ جذبات کو ابھار رہا ہے، جناب ،" ایلچی نے کہا۔

" تم سب کے سب خونخوار ہو ! "

پھر فون پٹخ دیا گیا۔

" یہ کون تھا ؟ " ایلچی کی بیوی نے پوچھا۔

" کوئی غیر ملکی صحافی ۔"

" اوہ ،" وہ بولی

" مگر وہ یہاں ہی پلا بڑھا ہے ۔"

ایلچی نے بتایا۔

" اف،" وہ بولی۔

" اور وہ غصہ میں ہے کہ لوگ اُسے مقامی نہیں سمجھ رہے۔"

" یہ شاید واحد بندہ ہے جس کے لئے میں نے سُنا کہ وہ یہاں کا مقامی سمجھا جانا چاہتا ہے۔" وہ پھر گویا ہوئی۔

دونوں ہنسے۔

" شب بخیر ،" ایلچی نے کہا۔

" شب بخیر ۔" بیوی بولی۔

پھر ، اچانک ایلچی اُٹھ کر بیٹھ گیا۔

" کیا واقعی تم ہمارے ملک کے بارے میں یہی سمجھتی ہو ؟ "

* * * * * * *

‍