دیدبان شمارہ ستمبر- اکتوبر

‍

نعتِ سيد الابرار ﷺ

‍

غلام مصطفیٰ دائمؔ

‍

‍

‍

اے کہ تسطیر بہ ارقامِ خدا صلّ علیٰ

ہر تناظر ترا بے مثل رہا، صلّ علیٰ

یوں اجابت کا درِ بستہ کھُلا صلّ علیٰ

مجھ پہ طاری جو ہوا بہرِ دعا: صلّ علیٰ

نقطۂ فہم نہ ہو سر بگریباں کیونکر؟

خطّ قوسینِ دنیٰ ایسا پڑا، صلّ علیٰ

سنّتِ ربّ عُلا یوں ہوئی ہم رشتۂ قلب

جنبشِ دل نے جو ہر دُھن میں کہا: صلّ علیٰ

صاحبِ منبرِ نُہ پایۂ افلاک، نبی!

سرِ دل کوکبۂ ہفت رِجا صلّ علیٰ

شمعِ توصیف، مٹانے کو یہ تیرہ بختی

ہوئی صمصام ادا جلوہ نما صلّ علیٰ

مُسطرِ عرش پہ دیکھا تھا جب اک اسمِ بدیع

چشمِ آدم ہوئی کیا زمزمہ زا! صلّ علیٰ

تجھے مقیاسِ تناسُب کا وہ معیار کہوں!

جہتِ عبد جہاں جلوہ فزا صلّ علیٰ

لوحِ فرہنگِ جنوں عقل کا ساماں ہوگی

روحِ زر نقش کا آرام سرا صلّ علیٰ

خونِ خم خانۂ بدگوئی ہوا برسرِ عقل

حرفتِ نعت کا جب تُخم اٹھا صلّ علی

صبح دم شعلۂ خورشید میں کیا ٹھنڈک تھی!

نغمہ پیرا تھی کوئی جُوئے صبا، صلّ علیٰ

نعت آثار بنانے نفَسِ نافذ کو

میں نے باندھا کیا پیمانِ وفا صلّ علیٰ

دُرِ غلطاں سرِ عارض سے جو دائمؔ اُترا

طاقِ دل جھوم اٹھا صلّ علیٰ صلّ علیٰ

‍