کہکشاں تبسّم کی دو نظمیں
کہکشاں تبسّم کی دو نظمیں
Sep 11, 2023
دیدبان شمارہ ۔۱۹
نظم:کوچٸہ شہرِ طلب میں۔۔۔
کہکشاں تبسّم
ہما اپنے پروں میں
منصبی خلعت چھپاۓ
حریصانِ زمن کے
سر پہ اڑتی پِھر رہی ہے
سگِ آوارگاں بھی
رال ٹپکاتی زباں باہر نکالے
کوچٸہ شہرِ طلب میں
بلبلاتے دُم ہلاتے پِھر رہے ہیں
کوٸی ٹکڑا ملے منہ بھر
کہ بھوکی آتما کی آگ ٹھنڈی ہو
کواڑوں پر لٹکتے
مفلسی کے قفل اُتریں
کُبیری دَھن کی بارش ہو
ہوس بے انت صحرا کی طرح
دالان میں پسری پڑی ہے
کہاں ہے کاروانِ سر فروشاں
کرے آباد جو مقتل
کہ سرشاری و شادابی جلے کھیتوں میں لہرائے
یہ سوکھی پسلیوں والے
ہجومِ گریہ زاراں کے قدم آخر
مقامِ عافیت کی چاہ میں
کس پل صراطی رہ گزر پہ ہیں
سوالوں کے علَم کی دھجیاں کرتے
شرر زادے
ہر اک کوچہ
ہراک بستی کے سر پہ
فنا کا تاج دھرتے جا رہے ہیں
بہی کھاتے بھی دَھنّا سیٹھ کی صورت
دِنوں دِن اور تنومند ہوتے جاتے ہیں
ہر اک نمبر بڑھانے کے جنوں میں
وحشت و دہشت کا ابلیسی نمونہ بن چُکا ہے
خدایا !
مجرموں کی کُچھ پکڑ تو ہو
اب اپنے بے کس و مظلوم بندوں کی
صداۓ گریہ زاری سن
بپا ہے اِک قیامت سی
کوئ روزِ حساب آئے
!!نظم:عذاب گاتھا
کہکشاں تبسم
سوال یہ ہے
زبان پتھر سی منجمد کیوں؟
نظر چراتی بصارتیں کیوں؟
گریزپا ہیں سماعتیں کیوں؟
مصافحے کیوں منافرت کا علم اٹھائے
مناقشوں میں اُلجھ گئے ہیں
غبار آنکھوں سے دل کے رستے
رگوں میں جاکر پسر گیا ہے
شگُن کی ڈھولک کی تھاپ بھی اب
جو رزم خوانی سی لگ رہی ہے
تو کیوں ہے ایسا؟
مدُھر سُروں کے بھی راگ سارے
بدل کے پنچم کے روپ میں ہیں
سماعتوں پر خراش ہیں کیوں ؟
فریبی منصب پہ جاگزیں ہیں خباثتیں کیوں؟
جو مرغزاروں کا خواب لے کر
سفر اندھیری گپھا کی جانب رواں دواں ہے
تو کیوں ہے آخر؟
ندی سبک سی جو بہہ رہی تھی
پھر اس کی بانہیں مڑوڑیں کس نے؟
شگاف دھرتی میں کیسے آیا؟
کہ دھنس رہی ہے ہمکتی بستی
ہے کوہساروں کاچاک سینہ
ہیں نوحہ گر کیوں چہکتے جنگل
کلام کرتے تھے جن سے سب خوش گلو پرندے
جو وُسعتِ رہ گزر کی خاطر گھنیرے برگد،
بزرگ پیپل نےاپنی جانیں نثار کردیں
اب اُن کی روحیں تڑپ رہی ہیں
نہ گفتگو کی ملاحتیں ہیں
نہ بانہہ تھامے شکایتیں ہیں
نہ مجلسیں ہیں حکایتیں ہیں
الاٶ سارے بجھے ہوۓ ہیں
سوال یہ ہے
ہماری دنیا فسونی پنجرے میں قید کیوں ہے؟
طلسم ٹوٹے تو کیسے ٹوٹے؟
قلم فسردہ،
سراۓ جاں میں عجیب دہشت بچھی ہوٸی ہے
کوٸی تو لکھّے عذاب گاتھا
کوٸی تو آنکھوں کی سوٸیوں کو نکالے آکر
کوٸی تو پنجرے کو توڑ ڈالے !!
دیدبان شمارہ ۔۱۹
نظم:کوچٸہ شہرِ طلب میں۔۔۔
کہکشاں تبسّم
ہما اپنے پروں میں
منصبی خلعت چھپاۓ
حریصانِ زمن کے
سر پہ اڑتی پِھر رہی ہے
سگِ آوارگاں بھی
رال ٹپکاتی زباں باہر نکالے
کوچٸہ شہرِ طلب میں
بلبلاتے دُم ہلاتے پِھر رہے ہیں
کوٸی ٹکڑا ملے منہ بھر
کہ بھوکی آتما کی آگ ٹھنڈی ہو
کواڑوں پر لٹکتے
مفلسی کے قفل اُتریں
کُبیری دَھن کی بارش ہو
ہوس بے انت صحرا کی طرح
دالان میں پسری پڑی ہے
کہاں ہے کاروانِ سر فروشاں
کرے آباد جو مقتل
کہ سرشاری و شادابی جلے کھیتوں میں لہرائے
یہ سوکھی پسلیوں والے
ہجومِ گریہ زاراں کے قدم آخر
مقامِ عافیت کی چاہ میں
کس پل صراطی رہ گزر پہ ہیں
سوالوں کے علَم کی دھجیاں کرتے
شرر زادے
ہر اک کوچہ
ہراک بستی کے سر پہ
فنا کا تاج دھرتے جا رہے ہیں
بہی کھاتے بھی دَھنّا سیٹھ کی صورت
دِنوں دِن اور تنومند ہوتے جاتے ہیں
ہر اک نمبر بڑھانے کے جنوں میں
وحشت و دہشت کا ابلیسی نمونہ بن چُکا ہے
خدایا !
مجرموں کی کُچھ پکڑ تو ہو
اب اپنے بے کس و مظلوم بندوں کی
صداۓ گریہ زاری سن
بپا ہے اِک قیامت سی
کوئ روزِ حساب آئے
!!نظم:عذاب گاتھا
کہکشاں تبسم
سوال یہ ہے
زبان پتھر سی منجمد کیوں؟
نظر چراتی بصارتیں کیوں؟
گریزپا ہیں سماعتیں کیوں؟
مصافحے کیوں منافرت کا علم اٹھائے
مناقشوں میں اُلجھ گئے ہیں
غبار آنکھوں سے دل کے رستے
رگوں میں جاکر پسر گیا ہے
شگُن کی ڈھولک کی تھاپ بھی اب
جو رزم خوانی سی لگ رہی ہے
تو کیوں ہے ایسا؟
مدُھر سُروں کے بھی راگ سارے
بدل کے پنچم کے روپ میں ہیں
سماعتوں پر خراش ہیں کیوں ؟
فریبی منصب پہ جاگزیں ہیں خباثتیں کیوں؟
جو مرغزاروں کا خواب لے کر
سفر اندھیری گپھا کی جانب رواں دواں ہے
تو کیوں ہے آخر؟
ندی سبک سی جو بہہ رہی تھی
پھر اس کی بانہیں مڑوڑیں کس نے؟
شگاف دھرتی میں کیسے آیا؟
کہ دھنس رہی ہے ہمکتی بستی
ہے کوہساروں کاچاک سینہ
ہیں نوحہ گر کیوں چہکتے جنگل
کلام کرتے تھے جن سے سب خوش گلو پرندے
جو وُسعتِ رہ گزر کی خاطر گھنیرے برگد،
بزرگ پیپل نےاپنی جانیں نثار کردیں
اب اُن کی روحیں تڑپ رہی ہیں
نہ گفتگو کی ملاحتیں ہیں
نہ بانہہ تھامے شکایتیں ہیں
نہ مجلسیں ہیں حکایتیں ہیں
الاٶ سارے بجھے ہوۓ ہیں
سوال یہ ہے
ہماری دنیا فسونی پنجرے میں قید کیوں ہے؟
طلسم ٹوٹے تو کیسے ٹوٹے؟
قلم فسردہ،
سراۓ جاں میں عجیب دہشت بچھی ہوٸی ہے
کوٸی تو لکھّے عذاب گاتھا
کوٸی تو آنکھوں کی سوٸیوں کو نکالے آکر
کوٸی تو پنجرے کو توڑ ڈالے !!