!آہ، فلسطین

نیلما ناھید درانی

‍

زخمی بچوں کے پھٹے سر نہیں دیکھے جاتے

مجھ سے ایسے یہ مناظر نہیں دیکھے جاتے

کیسے دیکھوں میں فلسطین کی روتی مائیں

مجھ سے یہ ٹوٹے دیوار و در نہیں دیکھے جاتے

کیسے بچوں کے جنازوں پہ میں آنسو  روکوں

پھر سے کربل کے مناظر نہیں دیکھے جاتے

کون آئے گا مدد کو وہ ہیں تنہا یارب

پھر سے  یہ قاسم و اصغر نہیں دیکھے جاتے

کیسے اغیار کو میں دوش دوں  اس دنیا میں

جبکہ مسلم  ہیں یوں  بے سر نہیں دیکھے جاتے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

‍

‍

کوئی خبر دے

‍

نیلما ناھید درانی

‍

۔۔۔۔۔۔۔۔۔

کوئی خبر دے

وہ جن کے قدموں کی آہٹوں سے

جہاں میں خوشبو بھری ہوئی تھی

وہ بچے! جن کو ابھی کھلونے پکارتے ہیں

کدھر گئے ہیں

کوئی خبر دے

کہ آج کوئی مرا نہیں ہے

غزہ۔۔کے معصوم شہریوں پر

کوئی ستم۔۔اب ہوا نہیں ہے

جوان بہنوں کی بین کرتی صدائیں

خاموش ہو گئی ہیں

ضعیف آنکھوں کے اشک گالوں پہ رک گئے ہیں

فضا سے بارود ہٹ گیا ہے

جو جنگ کا بادل تھا چھٹ گیا ہے

کوئی خبر دے

کہ جو بلا تھی۔۔۔وہ ٹل گئی ہے

کہ اب قیامت گزر گئی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

‍

نیلما ناھید درانی

‍